تاریخ میں سب سے زیادہ فروخت ہونے والے موبائل فونز

اگر ہم تاریخ میں سب سے زیادہ فروخت ہونے والے فونز کی فہرست تیار کریں تو آپ کے خیال میں اس میں کون کون سے فونز شامل ہوں گے؟ جن فونز کے بارے میں آپ سوچ رہے ہیں، وہ تو بالکل بھی نہیں ہیں جیسا کہ سام سنگ کی گلیکسی ایس سیریز اور نوٹ سیریز کا کوئی فون وغیرہ بلکہ کوئی ایک بھی اینڈرائيڈ فون اس فہرست کا حصہ نہیں ہے۔ لیکن اس سے بھی بڑی حیرت کی بات یہ ہے کہ نوکیا کے کئی فیچر فونز اس فہرست کا حصہ ہیں اور سام سنگ، موٹورولا اور ایپل کی بھی پرانی ڈیوائسز بھی اس میں جگہ بنانے میں کامیاب رہی ہیں۔ آئیے دیکھتے ہیں تاریخ میں سب سے زیادہ فروخت ہونے کا اعزاز کن فونز کو حاصل ہوا ہے۔

10۔ موٹورولا ریزر وی3 – فروخت: 130 ملین سے زیادہ


موٹورولا ریزر وی3 اپنے زمانے کا شاہکار تھا۔ اس کا خوبصورت ڈیزائن صارف کو سب سے الگ اور سب سے جدا کر دیتا تھا اور یہی وجہ ہے کہ یہ اپنے زمانے کا کامیاب ترین فون بنا۔ نہ صرف یہ تاریخ میں سب سے زیادہ فروخت ہونے والے ٹاپ 10 فونز میں شامل ہے بلکہ یہ فلپ فونز میں بھی سب سے زیادہ معروف ہے۔ ریزر وی3 کا مقابلہ آج کے کسی فون سے تو نہیں کیا جا سکتا لیکن اپنے دنوں میں یہ ایک بہترین فون تھا۔


9۔ نوکیا 2600 – فروخت: 135 ملین سے زیادہ


2004ء میں جاری کیا جانے والے نوکیا 2600 میں تو زیادہ کچھ تو نہیں تھا، کم از کم آج کے معیارات کے لحاظ سے تو کچھ بھی نہیں لیکن یہ سادہ اور مضبوط ڈیوائس بہت مقبول ہوئی۔ ڈیڑھ انچ کا ڈسپلے رکھنے والے اس فون میں نہ ہی کیمرا تھا، نہ بلوٹوتھ اور نہ ہی کوئی اور کام کا فیچر لیکن اس کی زبردست بیٹری لائف اور کم قیمت اس کی مقبولیت کا اصل راز تھا۔


8۔ سام سنگ ای1100 – فروخت: 150 ملین سے زیادہ


نوکیا 2600 کی طرح سام سنگ ای1100 بھی مضبوط فون تھا جس کی بیٹری لائف جاندار تھی، پورے 13 دن کا اسٹینڈبائے ٹائم۔ 2009ء میں آنے والا یہ فون دنیا بھر میں دستیابی اور کم قیمت کی وجہ سے مشہور ہوا۔ 1 اعشاریہ 52 انچ ڈسپلے کے ساتھ اس میں 1 ایم بی کی انٹرنل اسٹوریج تھی۔ جی ہاں! ہم نے غلط نہيں لکھا، یہ 1 ایم بی ہی ہے، اور ساتھ ہی اس میں فلیش لائٹ بھی تھی تاکہ اندھیرے میں کام آ سکے۔


7۔ نوکیا 5230 – فروخت: 150 ملین سے زیادہ


نوکیا 5230 ایک ابتدائی سطح کا اسمارٹ فون تھا جس میں 3.2 انچ کی ٹچ اسکرین تھی، یہ سمبیئن آپریٹنگ سسٹم چلاتا تھا اور 3 جی کنیکٹیوٹی بھی رکھتا تھا۔ اس میں جی پی ایس، 2 میگاپکسل کیمرا اور 128 ایم بی کی ریم تھی۔ یہ ڈیوائس وائی فائی نہيں رکھتی تھی لیکن 2009ء میں وائی فائی اتنا مقبول بھی نہیں تھا۔


6۔ نوکیا 6600 – فروخت: 150 ملین سے زیادہ


اس فون کے انوکھے ڈیزائن نے ہی اسے خاص بنایا۔ خود دیکھیں، یا تو دیکھتے ہی آپ کو پسند آ جائے گا یا آپ کو نفرت ہو جائے گی۔ لیکن اپنے زمانے میں یہ زیادہ تر لوگوں کو پسند آیا اور اس کا ہی نتیجہ تھا کہ یہ دنیا بھر میں 150 ملین سے زیادہ فروخت ہوا۔ جب 2003ء میں نوکیا 6600 آیا تھا تو یہ جدید ترین فون تھا، 2 اعشاریہ 1 انچ کا ڈسپلے، ایک بنیادی کیمرا اور 850 ملی ایمپیئر آور کی بیٹری۔ یہ مہنگا بھی بہت تھا، لگ بھگ 700 ڈالرز کا۔


5۔ نوکیا 1200 – فروخت: 150 ملین سے زیادہ


نوکیا 1200 کا سب سے بڑا فیچر تھا اس کی بڑی بیٹری، 7 گھنٹے کا ٹاک ٹائم اور 390 گھنٹوں کا اسٹینڈ بائے۔ اس میں فلیش لائٹ بھی تھی لیکن اس کے علاوہ فون میں کچھ خاص نہیں تھا۔ بس نوکیا نے اسے مضبوط اور سستا بنایا تھا۔ پھر اسے پھیلایا بھی دنیا بھر میں، شاید ہی کوئی ملک ایسا ہو جہاں یہ دستیاب نہ تھا۔ یہی وجہ ہے کہ نوکیا 1200 کے 150 ملین سے زیادہ یونٹس فروخت ہوئے آج یہ تاریخ کے پانچ مقبول ترین فونز میں سے ایک ہے۔


4۔ نوکیا 3210 – فروخت: 150 ملین سے زیادہ


نوکیا 3210 بہت پرانا فون ہے اور غالباً اس زمانے کا جب آپ نے فون استعمال کرنا بھی شروع نہ کیا ہوگا۔ یہ فون 1999ء میں لانچ کیا گیا تھا اور اس میں صرف کالز ہو سکتی تھی اور میسج بھیجے جا سکتے تھے۔ یہ اپنی مضبوطی، رنگوں کے آپشنز اور پرکشش صورت کی وجہ سے بہت زیادہ کامیاب ہوا۔ اس کا سب سے بہترین فیچر تھا اسنیک گیم، جس کی وجہ سے لوگ گھنٹوں اسکرین سے چمٹے رہتے تھے۔


3۔ آئی فون 6 اور 6+ – فروخت: 220 ملین سے زیادہ


2014ء میں جاری ہونے والا آئی فون 6 اور 6 پلس اس فہرست کے سب سے جدید فونز ہیں۔ ویسے تو ان کا مقابلہ جدید آئی او ایس اور اینڈرائيڈ ڈیوائسز سے نہیں کیا جا سکتا لیکن دراصل یہ 10 مقبول ترین موبائلز کی فہرست کے سب سے جدید فونز ہیں۔ ان کی کامیابی کی وجہ تھی ان کی 4.7 اور 5.5 انچ کی بڑی اسکرینیں، جبکہ ان سے پہلے آئی فون 5 میں صرف 4 انچ کی اسکرین تھی۔ یہی وجہ ہے کہ آئی فون ابتدائی چند ماہ میں ہی اپنے پچھلے ماڈل سے تین مرتبہ زیادہ فروخت ہوگیا، جس کی ایک وجہ اس کا کم قیمت ہونا بھی تھا۔


2۔ نوکیا 1110 – فروخت: 250 ملین سے زیادہ


ہلکا، پھلکا، مضبوط اور سستا فون، نہ ہی کیمرا، نہ رنگین ڈسپلے، نہ نوکیا این70 جیسا خوبصورت ڈیزائن اور نہ ہی کچھ اور۔ اس کے باوجود 2005ء میں جاری ہونے والی یہ ڈیوائس فروخت میں سب کو پیچھے چھوڑ گئی۔ صرف کالز اور میسج کرنے اور اسنیک گیم کھیلنے والوں کے لیے یہ بہت ہی شاندار فون تھا۔


1۔ نوکیا 1100 – فروخت: 250 ملین سے زیادہ


تاریخ میں سب سے زيادہ فروخت ہونے والا فون تھا نوکیا 1100، جو یقیناً آپ نے بھی استعمال کیا ہوگا یا دیکھا ہوگا۔ 2003ء میں جاری ہونے والا یہ اسمارٹ فون سادہ سا تھا لیکن اس کے ڈیزائن نے اسے کافی مشہور کردیا۔ نوکیا کے فیچر فونز کی مقبولیت کا جو راز تھا، وہ سب کچھ اس میں تھا یعنی مضبوط و معیاری باڈی، پرکشش ڈیزائن اور کم قیمت۔ نوکیا کے وسیع نیٹ ورک نے اسے دنیا کے ہر خطے میں پہنچایا اور یوں تاریخ کا مقبول ترین فون بنا دیا۔

سام سنگموٹورولانوکیا