ہواوے Mate 20 کی تصاویر لیک، منفرد نوچ اور تین کیمروں کے ساتھ

12,152

ہواوے کا اگلا فلیگ شپ اسمارٹ فون Mate 20 اگلے چند ماہ میں منظر عام پر آجائے گا ۔ یہی وجہ ہے کہ اس فون سے متعلق مختلف معلومات افشاء ہونے کا سلسلہ شروع ہوگیا ہے۔ تازہ ترین لیکس میں اس فون کا مبینہ ڈیزائن سامنے آگیا ہے۔ اس فون میں پشت پر تین کیمرے ہونگے اور اس کی نوچ آئی فون کی نوچ سے کافی مختلف ہوگی۔

کسی نامعلوم ذرائع نے XDA ڈیویلپرز کو تصاویر فراہم کی ہیں جو Mate 20 کے انجینئرنگ سیمپل کی ہیں۔ آج کل منظر عام پر آنے والے بیشتر اینڈروئیڈ اسمارٹ فونز کی طرح اس میں بھی نوچ ہے لیکن یہ کافی چھوٹی ہے اور Oppo F9 اسمارٹ فون کی نوچ سے مماثلت رکھتی ہے۔ یہ ان لوگوں کے لیے اچھی خبر ہے جو آئی فون ایکس کی نقلیں دیکھ دیکھ کر اکتا گئے ہیں۔

Huawei Mate 20

اس سال مارچ میں جب ہواوے نے P20 پرو متعارف کروایا تھا تو وہ دنیا کا پہلا اسمارٹ فون تھا جس میں پشت پر تین کیمرے نصب تھے۔ Mate 20 میں بھی تین ہی کیمرے ہونگے لیکن ان کا ڈیزائن مختلف ہوگا۔ اس میں تین کیمرے اور ایک فلیش کو مربع شکل میں پیش کیا گیا ہے۔

Huawei Mate 20 Camera Setup

ہارڈ ویئر کی بات کریں تو اس میں 6.3 انچ کی AMOLED اسکرین ، 128 گیگا بائٹس کی اسٹوریج، 6 جی بی ریم، اسٹیریو اسپیکر اور 4200 ملی ایمپیئر آوور کی طاقتور بیٹری نصب ہوگی۔ اس بات کے قوی امکانات ہیں کہ مختلف اسٹوریج آپشنز کے ساتھ اس کی کچھ دیگر ورژنز بھی پیش کیے جائیں گے۔