اینڈروئیڈ ٹیبلیٹس پر اکثر ایپلی کیشنز چلتے چلتے کریش ہو جاتی ہیں، اس کے بعد یہ کام نہیں کرتیں۔ انھیں ری انسٹال کر لینے سے بھی مسئلہ حل نہیں ہوتا۔ جب بھی اس ایپلی کیشن کو چلائیں تو ایرر ملتا ہے کہ:
“Unfortunately (your app) has stopped.”
عام طور پر صارفین کسی بھی ایپلی کیشن کا یہ ایرر ٹھیک کرنے کے لیے اسے اَن انسٹال کر کے دوبارہ انسٹال کرتے ہیں لیکن یہ عمل بے سود ثابت ہوتا ہے۔ اکثر یہ ایرر اس وقت آتا ہے جب ایپلی کیشن اپ گریڈ ہوتی ہے۔ اس مسئلے کو ٹھیک کرنے کے لیے چند کارآمد طریقے موجود ہیں۔
پہلا طریقہ تو یہ ہے کہ ایپلی کیشن کا ڈیٹا اور کیشے صاف کر دیا جائے۔جیسے آپ کا ویب براؤزر ویب سائٹ کی فائلز کو عارضی طور پر اپنے پاس محفوظ کر لیتا ہے تاکہ وہ ویب سائٹ دوبارہ جلدی کھل سکیں اسی طرح آپ کا فون بھی ایپلی کیشن کی فائلز کو جمع کرتا رہتا ہے۔
ان فائلز کی صفائی سے اکثر یہ مسئلہ ٹھیک ہو جاتا ہے لیکن اس طرح ہو سکتا ہے کہ آپ کو ایپلی کیشن میں دوبارہ لاگ اِن ہونا پڑے، اس کی ساری سیٹنگز ختم ہو جائیں وغیرہ۔
یوں سمجھیں کہ ایپلی کیشن کا ڈیٹا اور کیشے صاف کرنا ایسے ہی ہے جیسے ایپلی کیشن کو ری انسٹال کرنا، فرق صرف یہ ہے کہ کیشے صاف کرنے میں وقت کم لگتا ہے، جب کہ ایپلی کیشن کو ری انسٹال کرنے میں وقت لگتا ہے۔
بہرحال اس کے لیے آپ اپنے فون کی سیٹنگز میں سے ’’ایپلی کیشن منیجر‘‘ میں آجائیں۔ ایپلی کیشن منیجر میں جو ایپلی کیشن مسئلہ کر رہی ہو اس میں آجائیں۔
یہاں آپ دیکھیں گے کہ ’’کلیئر ڈیٹا‘‘ اور ’’کلیئر کیشے‘‘ کے آپشنز موجود ہیں۔ ان پر کلک کرنے سے آپ یہ کام کر سکتے ہیں۔
یہ صفائی کرنے کے بعد دوبارہ ایپلی کیشن کو چلا کر دیکھیں، اب اسے صحیح طریقے سے چلنا چاہیے لیکن اگر ایسا نہ ہو تو سمجھ لیں کہ ایپلی کیشن کا یہ ورژن آپ کی ڈیوائس میں نہیں چل پا رہا۔ اب ہمیں اس ایپلی کیشن کا پچھلا یعنی پرانا ورژن انسٹال کرنا ہو گا۔
اسمارٹ فونز اور ٹیبلٹس کے ساتھ ساتھ یہ مسئلہ کمپیوٹر پر بھی آتا رہتا ہے اس لیے آپ اس بہترین ویب سائٹ کو نوٹ رکھیں:
اس ویب سائٹ پر ونڈوز، میک، اوبنٹو، اینڈروئیڈ اور آئی فون کی ایپلی کیشنز کے پرانے ورژنز محفوظ رکھے جاتے ہیں۔ مثلاً اسکائپ موجودہ اینڈروئیڈ ورژن 5.2 آپ کے پاس نہیں چل رہا تو اس ویب سائٹ سے آپ اسکائپ کا کوئی پرانا ورژن جیسے 5.1 یا 4.5 ڈاؤن لوڈ کر کے انسٹال کر سکتے ہیں۔
پرانا ورژن براہِ راست فون میں ڈاؤن لوڈ کر لیں یا پھر پی سی پر ڈاؤن لوڈ کرنے کے بعد فون میں منتقل کر کے انسٹال کر لیں اس طرح نہ چلنے والی ایپلی کیشن بھی باآسانی چل جاتی ہے۔
(یہ تحریر کمپیوٹنگ شمارہ مارچ 2015 میں شائع ہوئی)