پرانی چیزوں کو فروخت کرنا پہلے ایک مشکل کام ہوا کرتا تھا زیادہ سے زیادہ یہ سہولت دستیاب تھی کہ کسی اخبار میں اشہار دے دیا جائے۔
لیکن وقت ایسا بدلا کہ اب پرانی چیزوں کی خریدو فروخت کوئی مسئلہ نہیں رہا۔ اس سلسلے میں خاص طور پر او ایل ایکس ایک بڑا نام ہے۔
لیکن اس وقت چونکہ تمام بڑی ٹیکنالوجی کمپنیز تمام سہولیات ایک چھت تلے فراہم کرنے کے درپے ہیں اس لیے اس میدان میں فیس بک بھی گزشتہ سال چھلانگ لگا چکا ہے جب فیس بک مارکیٹ پلیس اکتوبر 2016 میں متعارف کرائی گئی۔
فیس بک مارکیٹ پلیس کے تحت آپ فیس بک پر بھی چیزوں کو فروخت کر سکتے ہیں یعنی اب او ایل ایکس پر بھی جانے کی ضرورت نہیں۔
اپنی اس سروس کو مزید اپ گریڈ کرتے ہوئے اب فیس بک نے اس کے ذریعے خاص طور پر کاروں کی خریدو فروخت کو آسان بنا دیا ہے۔
اس حوالے سے فیس بک نے آٹو ڈیلرشپ ویب سائٹس سے تعاون حاصل کیا ہے تاکہ فیس بک پر صارفین آسانی سے کاروں کی خریدو فروخت کر سکیں۔
اگرچہ اس سے قبل بھی یہ سہولت موجود تھی کہ گاڑی خرید و فروخت کے حوالے سے اس کی تمام معلومات جیسے کہ ماڈل اور قیمت وغیرہ کی اشاعت کی جا سکے لیکن اب فیس بک نے خاص طور پر گاڑیوں کے حوالے سے ایک الگ سیکشن ترتیب دیا ہے۔
اس طرح آپ باآسانی اپنی پسند کی گاڑی نہ صرف تلاش کر سکیں گے بلکہ فیس بک مسینجر کے ذریعے ہی ڈیلر سے بات چیت بھی کر سکیں گے۔