وٹس ایپ ڈیٹا گوگل ڈرائیو پر بیک اپ کریں

403

وٹس ایپ کی مقبولیت دن بدن بڑھ رہی ہے، اتنی اہم اور مقبول ایپلی کیشن کو مفت فراہم نہ کرنا ایک ناانصافی ہوتا، یہی وجہ ہے کہ فیس بک نے اس ایپلی کیشن کے حقوق حاصل کرنے کے بعد حال ہی میں اسے بالکل مفت کر دیا ہے۔ اس سے قبل وٹس ایپ پہلے سال استعمال کرنے کے لیے مفت تھی لیکن اس کے بعد ایک ڈالر سالانہ کی فیس مختص تھی، جسے اب ختم کرتے ہوئے وٹس ایپ کو بالکل مفت کر دیا گیا ہے۔

Backup_WhatsApp_Restore_Conversations1
وٹس ایپ کا ڈیٹا کسی کلاؤڈ اسٹوریج پر بیک اپ نہ ہونا اس میں بہت بڑی خامی تھی، اس کی وجہ سے اکثر اہم ڈیٹا ضائع ہو جاتا تھا۔ جب بھی کبھی آپ وٹس اَن انسٹال کریں یا یہ کریش ہو جائے تو ساری چیٹس حذف ہو جاتی تھیں۔ آخرکار حال ہی میں وٹس ایپ کی اس خامی کو دُور کر دیا گیا ہے۔ وٹس ایپ کے تازہ ترین ورژن 2.12.241 میں ڈیٹا کو گوگل ڈرائیو پر بیک اپ کرنے کا فیچر پیش کر دیا گیا ہے۔ اس فیچر کی بدولت اب آپ اپنی تمام چیٹس، تصاویر، وڈیوز اور آڈیوز کو اپنے گوگل اکاؤنٹ میں بیک اپ کر سکیں گے۔ اس طرح یہ اپ لوڈ کیا گیا آپ کا ڈیٹا آپ کے نئے وٹس ایپ میں ری اسٹور بھی ہو سکے گا۔

Backup_WhatsApp_Restore_Conversations2
اکثر صارفین کے پاس وٹس ایپ نے اپ ڈیٹ ہوتے ہی اس نئے آپشن کو سامنے پیش کر دیا۔ لیکن اگر آپ نے اس نئی اپ ڈیٹ کو نوٹس نہیں کیا تو سیٹنگز میں سے ’’چیٹ اینڈ کالز‘‘ میں آئیں، یہاں ’’چیٹ بیک اپ‘‘ کا آپشن موجود ہو گا۔

Backup_WhatsApp_Restore_Conversations3
اس آپشن کو فعال کریں تو آپ کے گوگل ای میل ایڈریس کی تصدیق کی جائے گی جس میں یہ بیک اپ محفوظ کیا جائے گا۔ اس کے علاوہ یہ بھی پوچھا جائے گا کہ ہر کتنے دن بعد آپ کا تمام ڈیٹا بیک اپ کیا جائے؟

Backup_WhatsApp_Restore_Conversations4
چیٹ کے علاوہ میڈیا فائلز جیسے کہ تصاویر اور وڈیوز کو بھی بیک اپ کیا جا سکتا ہے، چونکہ وڈیوز اپ لوڈ کرنے کے لیے انٹرنیٹ کا زیادہ استعمال ہوتا ہے اس لیے اسے منتخب کرنے کا آپشن الگ سے موجود ہوتا ہے۔ اگر آپ چاہیں تو موبائل ڈیٹا کی بچت کرتے ہوئے صرف وائی فائی پر بیک اپ کو فعال کر سکتے ہیں تاکہ موبائل ڈیٹا کا بے دریغ استعمال نہ ہو۔

Backup_WhatsApp_Restore_Conversations5
بیک اپ کیے گئے ڈیٹا کو جب آپ نیا وٹس ایپ انسٹال کریں تو ری اسٹور کیا جا سکے گا لیکن شرط یہ ہے کہ آپ پرانا فون نمبر اور ای میل ایڈریس ہی استعمال کریں۔ اس طرح جیسے ہی آپ پہلی دفعہ وٹس ایپ کھولیں گے فوراً پرانا ڈیٹا ری اسٹور کرنے کا آپشن پیش کر دیا جائے گا۔

Backup_WhatsApp_Restore_Conversations6
اس کے علاوہ اگر ڈیوائس میں اچھی اسٹوریج خالی ہو تو گوگل ڈرائیو کے علاوہ فون میں بھی بیک اپ محفوظ رکھا جاتا ہے۔
(یہ تحریر کمپیوٹنگ شمارہ فروری 2016 میں شائع ہوئی)