نوجوان فیس بک کا استعمال ترک کررہے ہیں، ایک نئی تحقیق میں انکشاف

309

ریسرچ فرم فرینک این میگڈ ایسوسی ایٹس نے حال ہی میں کئے گئے اپنے ایک مطالعے کی بنیاد پر دعویٰ کیا ہے کہ نوجوانوں میں فیس بک استعمال کرنے کی شرح حیرت انگیز تیزی سے کم ہورہی ہے۔ تحقیق میں اس بات کا بھی انکشاف کیا گیا ہے کہ فیس بک کو خیر آباد کہنے والے نوجوان انسٹا گرام اور واٹس ایپ پر منتقل ہورہے ہیں۔ یاد رہے کہ یہ دونوں پلیٹ فارم بھی فیس بک کی ملکیت ہیں۔

رپورٹ کے مطابق سال 2013ء میں فیس بک استعمال کرنے والوں کی کل تعداد میں سے 13 تا 17 سال کے نوجوانوں کی تعداد 94 فی صد تھی۔ اس سے گزشتہ سال یہ تعداد 95 فی صد تھی۔ تاہم اب یہ تعداد گھٹ کر 88 فی صد رہ گئی ہے۔

گزشتہ سال اکتوبر میں فیس بک کے چیف فنانشل آفیسر ڈیوڈ ایبرسمان نے بھی کہا تھا کہ نوجوان فیس بک کا استعمال ترک کررہے ہیں۔ تاہم فیس بک کی چیف آپریٹنگ آفیسر شریال سینڈ برگ نے اس وقت اس دعویٰ کی نفی کی تھی۔

رپورٹ میں یہ بھی کہا گیا ہے کہ صرف نوجوان ہی نہیں، بلکہ تمام ہی عمر کے افراد فیس بک سے دور ہورہے ہیں۔