اپنے ملک کے لیے نادستیاب ایپلی کیشنز کیسے انسٹال کریں

اپنے اسمارٹ فون پر کوئی ایپلی کیشن انسٹال کرتے وقت اکثر آپ نے دیکھا ہو گا کہ ایپلی کیشن اسٹور پر تو موجود ہوتی ہے لیکن آپ اسے انسٹال نہیں کر پاتے کیونکہ ابھی تک وہ آپ کے ملک کے لیے دستیاب نہیں ہوتی۔ اس لیے وہاں یہ لکھا ہوتا ہے: This item isn’t available in your country

مثلاً اگر آپ پوکے مون گو ایپلی کیشن کو آزمائیں تو یہ ایپ ابھی پاکستان میں دستیاب نہیں۔ اگرچہ ایسی ایپلی کیشنز کی APK فائل ڈاؤن لوڈ کر کے بھی انھیں انسٹال کیا جا سکتا ہے لیکن اس کے لیے ناقابلِ بھروسا ویب سائٹس پر جانا پڑتا ہے اور APK فائل کے بدلے وائرس یا وائرس زدہ فائل بھی ڈاؤن لوڈ ہو سکتی ہے۔

اس مسئلے سے بچنے کا آسان طریقہ یہ ہے کہ فون پر کوئی وی پی این ایپلی کیشن استعمال کریں جیسے کہ TunnelBear VPN ۔
وی پی این ایپلی کیشن کے ذریعے آپ باآسانی اپنا مقام بدل سکتے ہیں۔ ٹنل بیئر کے علاوہ بھی کئی ایسی ایپس دستیاب ہیں اور آپ اپنی پسند کی ایپ استعمال کر سکتے ہیں۔

اگر آپ پوکے مون گو انسٹال کرنا چاہتے ہیں تو وی پی این میں ایسا ملک منتخب کریں جہاں یہ ایپ دستیاب ہو جیسے کہ امریکا۔اس کے بعد جب آپ ایپلی کیشن کو گوگل پلے اسٹور پر دیکھیں گے تو اب وہ بخوشی انسٹال ہونے کے لیے موجود ہو گی کیونکہ اب کی بار اسے یہ نہیں معلوم کہ آپ دراصل بدستور پاکستان میں ہی موجود ہیں بلکہ پلے اسٹور آپ کو امریکی صارف سمجھتے ہوئے ایپلی کیشن پیش کر دے گا۔

اس کے علاوہ دوسرا حل یہ ہے کہ گوگل پلے اسٹور کی بجائے کسی دوسری ویب سائٹ سے ایپلی کیشن کی APK فائل ڈاؤن لوڈ کر کے انسٹال کر لیں۔ لیکن اس میں تھوڑا سا خطرہ رہتا ہے کہ کہیں فائل وائرس زدہ نہ ہو۔ اس لیے کوشش کریں کہ ہمیشہ قابلِ بھروسا ویب سائٹس سے APK فائلز ڈاؤن لوڈ کریں اور انھیں انسٹال کرنے سے پہلے اینٹی وائرس سے اسکین ضرور کر لیں۔

ایسی کئی ویب سائٹس موجود ہیں ان تک پہنچنے کے لیے آپ ایپلی کیشن کا نام گوگل پر لکھ کر تلاش کریں تو کئی نتائج آپ کے سامنے آجائیں گے۔

یہ تحریر کمپیوٹنگ شمارہ نمبر 123 میں شائع ہوئی