واٹس ایپ کا "خفیہ طریقہ” کئی دن پرانا میسج بھی unsend کریں

3,307

واٹس ایپ کا نیا طریقہ Delete for Everyone بہت مقبولیت حاصل کر رہا ہے۔ اس نئے فیچر میں صارف غلطی سے بھیجے گئے پیغام کو ‘unsend’ کر سکتا ہے لیکن اس پر ایک حد لگائی گئی ہے۔ آپ صرف 7 منٹ پہلے بھیجے گئے پیغام کے ساتھ ہی ایسا کر سکتے ہیں۔ البتہ ایک نیا خفیہ طریقہ نکالا گیا ہے جس سے پرانے پیغامات کے ساتھ بھی ایسا کیا جا سکتا ہے۔

اگر آپ فون کی گھڑی میں وقت اور تاریخ تبدیل کردیں تو پرانے پیغامات کو بھی unsend کر سکتے ہیں۔ یہ طریقہ گو کہ ‘جگاڑی’ قسم کا ہے لیکن کام ضرور کرتا ہے، خاص طور پر ان لوگوں کے لیے جو کسی میسج کے حوالے سے شرمندہ ہو رہے ہوں اور اسے واپس لینا چاہتے ہیں۔

کرنا صرف اتنا ہوگا کہ جو پیغام اڑانا ہے، اس کا وقت اور تاریخ نوٹ کرلیں۔ فون کو ایروپلین موڈ میں لائیں تاکہ اس کے رابطے کے تمام ذریعے بند ہو جائیں۔ اب سیٹنگز میں جاکر تاریخ اور وقت کو تبدیل کرکے اس جگہ پر لائیں جہاں مذکورہ پیغام 7 منٹ کے اندر اندر ہو۔ پھر چیٹ کھولیں اور میسیج کو منتخب کرکے ڈیلیٹ دبائیں اور Delete for Everyone کا انتخاب کریں۔ ایسا کرنے کے بعد ایپ بند کریں، ایروپلین موڈ سے بھی نکل آئیں اور فون کا وقت دوبارہ ٹھیک کرلیں۔ کام ہوگیا!

یہ طریقہ چند دن پرانے پیغامات تک تو اچھی طرح کام کر رہا ہے لیکن ایک ماہ پرانے میسیجز کو ڈیلیٹ کرنا اس کے بس کی بات نہیں لگتی۔ ایسی کوشش پر فون پر پہلے ہی غلط تاریخ کا پیغام آ جاتا ہے۔ XDA ڈیولپرز کے مطابق یہ طریقہ ایک ہفتہ پرانے پیغامات کے لیے کارگر ہے۔

گو کہ ایسے پیغامات وصول کرنے والے زیادہ تر افراد نے پڑھ ہی لیے ہوں گے لیکن پھر بھی اگر کوئی شخص چاہتا ہے کہ اس کا بھیجا گیا پیغام مزید نظر نہ آئے تو وہ اس trick کو آزما سکتا ہے۔

ویسے ایک اور طریقہ دریافت کیا گیا ہے کہ اگر آپ Delete for Everyone کا آپشن استعمال کر رہے ہیں تو مذکورہ پیغام پر tap اور hold کرکے رکھیں۔ اگر پیغام منتخب ہوا ہوا ہے تو آپ سات منٹ بعد بھی اسے unsend کر سکتے ہیں۔